فى يوم من الأيام كنت عايز ديوان شعر لأحد شعراءالحداثة فى مصر وهو الشاعر/محمد عفيفى مطر واسم الديوان (أنت واحدها وهى أعضاؤك انتثرت )ودرت ألف على البياعين بتوع الكتب وأنا متأكد إنهم جهلة ودى وسيلة أكل عيش ،ووقفت أمام أحدهم وبذوق ورقة وكلى أدب قلت :
ياعم الحاج أنا عايز ديوان شعر بتاع محمد عفيفى مطروصدر من مدة بسيطة .
قال لى :اسمه إيه ?????
قلت :اسمه "أنت واحدها وهى أعضاؤك انتثرت "وفجأة لقيت الراجل قام من على الكرسى وبصوت أجش وقال لى:
أنت بتقول إيه!!!إيه المسخرة وقلة الأدب والتربية ..أنا ببيع كتب محترمة كلها كتب دينية بتاعة بن كثير والطبرى والشيخ عبد الحليم محمود ومصطفى محمود ياأستاذ أنا راجل محترم وعيب عليك قوى وأنت راجل باين عليك إنك محترم !!!!!!!!!!!!
وبصراحة أنا ومن هول المفاجأة وقفت ساكت. وبهدؤ انسحبت . والراجل بيهلوس ويقول: حرام عليك ياأستاذ أنا أبيع كتب وحشة كده?????????????أنا راجل مسلم وموحد بالله..حرام عليكو ..أروح من ربنا فين..أنا عندى عيال عايز أربيهم ويخشواالجنة حرام عليكو ..حسبى الله ونعم الوكيل .
أنا مشيت وخفت من الراجل المهووس ولعنت اللحظة إللى سألت فيها على ديوان الشعر.
وأصبح زملائى يحكون الحكاية ويموتون من الضحك ويمثلون منظرى وأنا واقف قدام البياع ومش عارف أرد .
ليست هناك تعليقات:
إرسال تعليق